L'UGHJETTI LITURGICHI
Pà cilibrà a messa
U Calici
Vasu sacru, coppa distinata à cuntena u vinu chì sarà cunsacratu.
Coppa di Cumunioni
Vasu sacru, induva sò sposti l'Ostii cunsacrati è distribuiti duranti a Cumunioni, in più di u Ciboriu.
A Patena
Vasu sacru chì s'assumiglia ad un piattu annant'à quiddu sarà messu l'Ostia cunsacrata.
L'Acquaria
Buccali chì cuntena l'acqua pà u lavamentu di i mani.
U Ciboriu
Vasu sacru, distinatu à raccoglia l'Ostii. Fora di i cilibrazioni, u Ciboriu ferma cupartu incù una stoffa : u Pavillonu ind'è u Tabirnaculu.
I Misciaroli
Buccetti distinati à cuntena l'Acqua è u Vinu.
Pà a cunsirvazioni è l'adurazioni di u Santu Sacramentu
A Custodia
Vasu sacru in forma di scatuletta chì parmetta di traspurtà l'Ostia à i malati.
U Tarbinaculu
Picculu armeghju sarrata induva est spostu u Ciboriu cupartu d'un Pavillonu è chì cuntena l'Ostii cunsacrati. Un Cunupatu, stoffa piazzata davanti à u Tarbinaculu, inditta a prisenza di u Santu Sacramentu.
L'Ustinsoriu
Vasu sacru in forma di soli pà prisintà à l'adurazioni l'Ostia cunsacrata.
A Lunucula
Picculu stuvigliu tondu, di vetru, chì riceva l'Ostia cunsacrata ind'è l'Ustinsoriu.
Altri ughjetti utili à cunnoscia
U Binidittinu
Stagnonu chì cuntena l'Acqua binadetta.
A Navicedda
ricipientu chì cuntena i riservi d'incensu.
L'Aspirsoriu
Innacquaghjolu longu chì ghjova à spirginà l'Acqua binadetta.
L'Ampuddi
Buccetti distinati à riceva l'Olii Santi, com'à l'Oliu di i malati, l'Oliu di i catecumini è a Santa Crìsima.
L'Incinsoriu
ricipientu chì parmetta di fà brusgià l'incensu è tinutu incù una catena.
A Cridenza
Todda distinata à riceva u matiriali appruntatu pà a cilibrazioni.
I LINZOLI LITURGICHI
U Curpurali
Quadru di stoffa bianca, sticchitu, dispostu annant'à a tuvaglia di l'altari. U Curpurali hè piazzatu sopr'à a u Calici, Ciboriu è Patena durant'à a messa.
A pala
Quadru di stoffa cartunatu utili da cuprà u calici duranti a messa è scansà chì ni fallessini impurità ind'è u Vinu.
U Purificatoriu
Rittangulu biancu chì ghjova à purificà è nittà i vasi sacri dopu ad essa stati utilizati. D'usu, hè accapatu in 6 rittanguli più chjuchi.
U Pavillonu
Tissutu chì copra u Ciboriu quandu quiddu ni cuntena l'Ostii cunsacrati. D'usu, i culori suviteghjani u tempu liturgicu.
U Manutergu
Rittangulonu di stoffa bianca adupratu ind'è i cirimonii spiciali chì inghjuda un bisognu di lavàssi i mani ( Marcuri di i Cenari par asempiu ). Si priveda tandu una bedda vasca incù acqua è saponi. D'usu, hè accapatu in 9 rittanguli più chjuchi.
U Cunupatu
Linzolu piazzatu davant'à u Tabirnaculu pà indittà a prisenza di u Santu Sacramentu. Ghjè à spessu di culori adattatu à u tempu liturgicu.
CALCHÌ CUNSIGLII IN PIÙ
* Tutt'i linzoli sò fatti di linu ò cutoni. Pà mantinalli, v'accunsigliemi di passàlli à l'acqua chjara prima è dopu di lavalli. Pà quiddi chì sò sticchiti, pudeti amidunalli incù vapurizatori. Ùn vi scurdeti d'accapà u Purificatoriu è u Manutergu cum'edda ci voli.
* Ci voli sempri ad avè linzoli in più, mantuleddi bianchi pà asciuvà a testa duranti i battèsimi, picculi linzoli pà asciuvà i croci ò relichi quandu l'assemblea vena pà aduràlli è soprituvaglii pà pruteghja a tuvaglia di l'altari fora di i cilibrazioni
* Pinseti bè à armunizà i culori liturgichi insemi innanz'à a messa, sopratuttu pà u Pavillonu è u Cunupatu.
