I Cunfraterni, sò unu di i punteddi maestri di u patrimoniu suciali, culturali è spirituali di Corsica.

 

Cun eddi si ritròvani ghjòvani è anziani. I vàlidi aiùtani i malati. Cun eddi i vivi poni fà l’ultimu viaghju. È oghji quant’à prima n’avemi bisognu da ricurdacci da induv’è no vinimi, quali no semi è duva no vulemi andà.

 

Associ di laichi, era doppia a so vucazioni. Prima rilighjosa è spirituali, assicuràvani i prigheri, i canti è a « paraliturgia », vali à dì l’urganizazioni di i via cruci, i prucissioni, u intratena di a ghjesgia è di i cappeddi.

 

Veri sucità di succorsu mutuali, erani ancu punteddi suciali d’aiutu, assicuràvani l’intarru di i più sguaiati, aiutàvani i più misiriosi, andàvani à circà i morti tocchi da a pesta quandu più nimu vulia andà, s’inframittiani ind’i vindetti da appacià i famigli.

 

Dapoi sèculi è sèculi, sò u suchju di i cumunità, u lèvitu di a so vita dimucràtica, u sangui di a so idintità.

​

Quali semi ?

 

Era a cunfraternita di I Peri anticamenti chjamata  Santa Croci è si pò pinsà ch’edda hè nata ind’a mossa franciscana di u Medievu.

 

Tinìa a so sedi ind’uratoriu di Santa Libarata chì fù abbandunatu ind’u 1723, situatu à mezu à u paesi è l’antica ghjesgia di San Larenti Vechju.   

        

Supprimata da a leghji di u 18 Aostu 1782, s’hà da ricustituiscia dopu à a Rivuluzioni sottu à u vucàbuli di a Misericordia.

 

Avia issa cunfratèrnita di a Misericordia un cantu murtuàriu anticu : « A Cantìcula ».  Solu dui parsoni in paesi si n’arricurdàvani. Hè statu raccoltu è arrighjistratu ch’eddu firmessi in mimoria. 

 

Attiva sin’à principiu di seculu, a guerra di u 14 è i partanzi, (35 ghjovani di I Peri sò morti à a guerra), a cunfratèrnita di a Misericordia hè andata à spariscia.

 

Spustata ind’u 1925, uttanta anni dopu, hè ricustituita, in 2004, da i sòcii fundatori :

 

« A Cunfraternita di San Larenzu di I Peri ».

 

I Cunfraterni corsi sò antichi, ma ani sappiutu francà i danni di i sèculi. Ed hè cusì chì, à l’iniziu di u IIIemillenniu càntani sempri a spiranza luminosa mai spinta.

 

Ind’u cori è a menti di i so membri, si tratta di risponda, cù l’aiutu d’un mezu natu ind’i numarosi seculi di a nostra storia à i nicissità ughjinchi di leia suciali, di fraternità, di spiritualità.

 

Eccu i paroddi di Ghjesù :

 

 « Ùn sò  vinutu da essa sirvutu ma da serva. »

 

A paci, a sulidarità, l’aiutu, a ginirusità, a fidezza, eccu qualessu eddu hè u patrimoniu acquistatu longu à i seculi è trasmissu da una ginirazioni à l’altra da sparta insemi l’amori pà i morti è pà i vivi.

 

È cusì sia.