I CANTI SACRI
Cume ogni cunfraternita corsa, l'animazioni di a messa ferma una missioni di primura. Ind'è issu sensu, una tradizioni longa di i canti, à spessu in paghjella, cuntinueghja d'essa trasmetta ind'è ogni gruppu di cunfrateddi. I canti sacri, cume prufani, sò versi ripigliati di i paesi di Rusiu è Sermanu prima ind'è u fondu Quilici è dopu duranti à u Riacquistu. Oghji, issi canti facini parta di i nostri quaterni è ci parmettani di purtà una voci pà anurà i nostri ind'è a vita è a morti. Ind'è issu sensu, sta catiguria vi parmetta di tilicaricà u nostru quaternu di cantu è di senta i nostri voci è di davvi a pussibilità d'imparàlli avà è di trasmettalli dumani.
I nostri voci ùn sò beddi cume quiddi di i prufiziunali, i nostri quaterni ùn sò senza sbagliu di latinu, talianu ò ancu corsu, ma sì volini essa ciò ch'è no' semi : sputichi, associ d'amichi è di laichi chì volini participà à passu soi pà mantena a nostra pietà pupulari, a nostra fedi, i nostri valori è a nostra idintità.
NANZU DI PRINCIPIÀ
Da pudè davvi un sguardu sanu di i canti sacri da cunnoscia di cori ò i più praticati ghjorni à ghjorni, vi prupunimi quì 3 catigurii chì raprisentani vicinu à 90% di u ripirtoriu ad aduprà chì sò : a messa cumuna di i vivi, a messa cumuna di i morti è i canti più particulari pà avvinimenti cume a Pasqua, Natali ò i matrimonii.
Pà ogni canti, pudareti senta ogni voci di modu spiccatu è l'armunia di i trè voci insemi. Di issa maneri, avareti a pussibilità di ritravaglialli à modu vostru in casa ò in ripitizioni.
A TUNALITÀ
"ùn ci sò cà duii tunalità pà u cantu sacru : pietosa è sulenna"
diciani l'anziani. U scopu quì ùn hè micca quiddu di l'animatori nè di u spittàculu : ci voli ad accumpagnà u preti ind'è a spartera di u Vanghjelu. Tandu, da fallu cum'edda ci voli, ci voli à cantà nè tropp'altu, nè troppu bassu è piuttostu circà l'armunia. D'usu, s'adopra i soni "SOL" ò "FA#", chì parmettini di dà putenza à u cantu senza fà brioni ò essa sfiatu subbitu. A certi volti, cume pà i festi maiori ò ghjorni di gioia, si pò ancu cuddà sin'à "SOL#" ma micca di più.
Da aiutavvi, vi cunsigliemi di cumprà u ziffulinu (diapason) chì parmetta di davvi a tunalità ogni cantu nanzu di lampà a siconda.
Fora di u ziffulinu, a chjama, principiu di u cantu senza pulufinia, chì si pò senta in parechji canti sacri, parmetta di dà a tunalità à a siconda.
